Nagsayaw sa diskohan giluba patay

CEBU, Philippines - Patay ang usa ka batan-on human kini dunggaba samtang nagsayaw sulod sa diskohan   sa barangay Pandakan, lungsod sa Pinamungajan sa miaging gabii.

Ang biktima mao si Marvin Laptahe Calipay, 18, ulitawo, nga taga Sityo Baybay, barangay Pandakan, samtang ang suspek wala pa matumbok sa kapolisan sa paghimo ning balita.

Si PO2 Salvador Samelliano sa Pinamungajan Police Station mibutyag sa Banat News nga sa sayo pa puwerting nakasayaw sa biktima sulod sa diskohan dihang kalit lamang kining gihansakan sa kutsilyo sa usa ka mamumuno nga wala hiilhi.Nakurat nalang ang ubang nanisko dihang kalit lang nahagba sa yuta ang biktima nga naglunang sa kaugalingon niining dugo kay dughan niini maoy nasabak sa kutsilyo.

Dihang naligid na sa yuta ang biktima, misirit usab dayon og dagan ang kriminal uban sa mga naniskohay nga mikabad og panagan   gawas sa koral ug walay nakaila sa maong mamumuno.

Gihatod dayon ang biktima sa iyang mga kabanay ngadto sa Pinamungahan District Hospital apan gi-transfer usab dayon ngadto sa Vicente Sotto Memorial Medical Center (VSMMC) diin kini ideklarar nga dead on arrival.

Ang kapulisan padayon pa sa pagpaniid sa kriminal aron sa pagsikop niini kinsa gituohan sa kapolisan nga kontra sa biktima.

Sikyu gidunggab sa kauban angol

Ni Darrel Carumba

Kritikal ang kahimtang sa usa ka gwardiya human kini unaya og dunggab sa iyang kaubang gwardiya didto sa Ward-3 barangay Poblacion lungsod sa Minglanilla sa miaging gabii.

Ang biktima mao si Ronniel Canon, 31, ulitawo, nga taga barangay Tulay, Minglanilla ug gwardiya sa Silencer Security Agency apan nadestino sa MIWASCO Water Cooperative nga nahimutang sa maong lugar.

Samtang ang suspek mao usab si Francisco Basister, 56, minyo, nga taga Pakigne, Minglanilla nga kaubang gwardiya sa biktima.

Si PO1 Abelardo Biton sa Minglanilla Police Station mibutyag sa Banat News nga sa wala pa ang pagpanunggab, ang suspek nangandam na nga mopauli kay off-duty na kini ug mopuli usab kaniya ang biktima, kinsa giingong nakainom og ilimnong makahubog.

Unya midugang si PO1 Biton nga nagkalalis ang biktima ug ang suspek hangtod nga giingong mikuha og kutsilyo ang biktima sa kusina sa gibantayan nilang buhatan, apan sa pagbalik niini kay dunggabon ang suspek, nailog kini sa naulahi ug gidiretso og hansak ngadto sa tiyan sa biktima.

 Daling gihatod ang biktima ngadto sa Minglanilla District Hospital apan gi-transfer usab dayon kini sa tambalanan sa dakbayan sa Sugbo tungod sa talandugon nga kahimtang.

Samtang ang suspek boluntaryo usab   nga mitahan sa iyang kaugalingon sa kapolisan ug gibalhug dayun sa karsel samtang gihikay ang kasong ipasaka batok kaniya. (BANAT NEWS)