1 giluba sa Mingla'

CEBU, Philippines - Patay ang usa ka lalaki human kini unaya sa pagluba sa iyang kaubang construction worker nga iyahang gikainom ug nakasinukmagay niadtong Sabado sa hapon diha sa barangay Ward II, Poblacion, lungsod sa Minglanilla.

Ang biktima giila sa mga polis nga si Jerry Labajo, taga sitio Camp 3, barangay Jaclupan dakbayan sa Talisay kinsa nakaangkon og samad dinunggaban sa tuong bahin sa dughan ug tuong abaga daling gidala ngadto sa Minglanilla District Hospital apan pila ka minuto ang milabay nakabsan kini sa kinabuhi diha sa nahisgutang tambalanan.

Ang suspetsado mao si Joel Fernandez, taga sitio Bakay, barangay Tulay, Minglanilla nakaikyas human sa hitabo ug padayong gipangita sa mga polis.

Ang duha kauban isip construction worker diha sa gitukod nga dakung tindahan sa Ward II. Si PO2 Jade Abrica, duty desk officer sa Minglanilla Police Station sa pakighinabi sa Banat News, nagkanayon nga si Labajo ug Fernandez gikan sa ilang trabaho mihapit og inom diha sa maong lugar.

Apan dangtan pila ka minutos nagkalalis ang duha ug dayon nagkasinukmagay       ug giingong nalupig si Fernandez hinungndan nga mipauli kini ngadto sa ilahang balay ug mibalik nga nagdala na og kutsilyo ug sa walay daghang pangutana gihansakan si Labajo. (BANAT)