Miapas sa anak gipatay

CEBU, Philippines - Patay nang naabtan sa kapolisan ang usa ka amahan nga sa sayo pa nangita unta sa iyang anak diha sa barangay Bugas lungsod sa Badian niadtong Miyerkules mga alas 10:00 sa kagabhion.

Ang biktima mao si Vicente Balbuena, 38, usa ka mananagat, ug nagpuyo sa barangay Manduyong lungsod sa Badian, samtang ang suspetsado sa pagpanunggab mao si Marcelino Taypin, 46, usa ka panday ug nagpuyo sa barangay Bugas sa samang lungsod.

Sa inisyal nga imbestigasyon nga gihimo sa kapolisan sa Badian, nasayran nga niadto si Balbuena sa balay ni Taypin tungod kay adunay nakasulti nga atua sa balay niini ang iyang anak nga 14-anyos nga iyang gipangita.

Kauban ni Balbuena ang mga nakasaksi sa hitabo nga sila si Manolito Puerme, Hamilton Alcones ug Sanny Bayosyos pulos taga barangay Bugas.

Matud pa ni PO2 Redeemer Abendan sa pakighinabi sa Banat News nga milakaw ang bata nga wala mananghid ug miadto sa iyaan nga asawa sa suspek diha sa maong barangay.

Sumala pa ni Abendan naabtan sa biktima ang anak sa balay sa iyang igsuon, ug nianang pagkagabii nanihapon sila uban sa suspek ug nag-inom apan dangtan pila ka gutlo gikasab-an sa biktima ang bata hinungdan nga gibadlong sa suspek.

Apan nakaingon kini sa ilang init nga panaglalis ug tunga-tunga sa panaglalis sa duha mikuha og plamingko ang suspek sa kusina ug gidiretso og dunggab makadaghang higayon ang biktima sa nagkalainlaing parte sa lawas.

Pag-abot sa kapolisan sa Badian sa dapit diin nahitabo ang krimen didto na nila makit-i ang naghayang nga lawas sa biktima sa kamaisan 20 ka metros ang gilay-on gikan sa balay sa suspek. Daling gidala sa Badian District Hospital ang biktima apan gideklarar kining dead on arrival sa doktor. Ang kapolisan dali sad nga nihimo og hot pursuit operation aron masikop ang suspek.

Didto na madakpi ang suspetsado sa barangay Busay sa lungsod sa Moalboal ug nakuha gikan kaniya ang plamingko nga gituhoang maoy iyang gigamit sa pagpanunggab sa biktima. – BANAT NEWS