Mga batang may kanser paeskuwelahon

CEBU, Philippines - Gilusad niadtong Lunes sa Kapwa Ko, Mahal Ko Foundation, Inc. (KKMKF) ang ilang bag-ong programa nga “Kanser-Skwela”, usa ka home-based alternative learning para sa mga batang adunay sakit nga kanser, sa Chateau de Busay Restaurant siyudad sa Sugbo.

Kining programa giatol sa ika-18 anibersaryo sa KKMKF, ang ilang programa ipahigayon pinaagi sa panag-uban nila sa Department of Education (DepEd) ug sila nagtinguha aron mahatagan ang mga bata nga adunay kanser og pormal nga edukasyon.

Ang mga batang nasakit og kanser sagad mapugos paghunong sa ilang pag-eskwela tungod sa pagbalik-balik nila sa mga sesyon sa chemotherapy nga diin tambalan ang ilang sakit.

Ang programa mohatag og alternatibong edukasyon ngadto sa 17 ka mga bata nga nag-edad og tres ngadto sa otso anyos nga wala pa makatungha sa eskwelahan.

Uban nga makabenepisyo mao ang walo ka mga bata nga nag-edad og nuwebe ngadto sa 16-anyos nga mihunong og tungha tungod sa chemotherapy.

Si Cebu City Councilor ug Presidente sa KKMKF, Margot Osmeña mipadayag nga ang foundation dili mahimong posible kun walay tabang gikan sa mga volunteers.

Ang KKMKF kasamtangang adunay 57 nga batang adunay kanser diin 29 nangaayo na ug 28 ang padayong nag-chemotherapy. (BANAT)