Giligid og bunal sa tubo angol

CEBU, Philippines - Angol ang usa ka drayber sa taxi human kini pusposi og tubo sa laing drayber sa taxi didto sa reclamation area sa barangay Tipolo, dakbayan sa Mandaue sa miaging gabii.

Ang biktima mao si Edwin Tolentino, 33 , nga lumad nga taga Samboan, Cebu ug drayber sa Erlland taxi, samtang ang suspetsado mao si Victor Batistis, 31 nga taga Canjulao, dakbayan sa Lapulapu ug drayber sa Spider taxi.

Si SPO1 Emmanuel Enople, imbestigador sa Presinto 2 sa Subangdaku Police Station miingon nga daan na nga nagkabikil ang duha tungod sa pag-inilogay og pasahero.

Unya nagkasabot ang duha nga magsinumbagay sa reclamation area sa dakbayan sa Mandaue.

Maoy hinungdan nga sa ilang panagtagbo sa maong dapit nagharong gilayon kini ug nagsinukliay sa ilang mga kinumo apan maayong manukmag si Batistis nga maoy nakaaghat kang Tolentino sa pagkuha og tubo. Unya giligid dayon og bunal ni Tolentino sa gidala niining tubo si Batistis ug misagunto kini sa kasakit apan nailog niya ang maong tubo ug gisumbalik kini sa pagbunal ngadto kang Tolentino.

Matud pa ni SPO1 Enople nga si Tolentino nga nasugamak sa grabeng bun-og gihatod dayon kini ngadto sa tambalanan.

Hinuon si Batistis nga nadakpan usab dayon sa kapolisan mipasalig nga siyay moabaga sa gasto sa pagkahospital ni Tolentino. (BANAT)