Convention sa mga cardiologist anhi himoa sa Sugbo
CEBU, Philippines - Gitakda nga anhi ipahigayon sa Sugbo ang Asian Congress of Cardiology (ACC) karong Decembre 1 - 3 sa Waterfront Hotel sa barangay Lahug ning dakbayan sa Sugbo.
Kini human mapili sa mga langyaw nga presidente sa kahugpongan sa mga doktor sa sakit sa kasingkasing ang Sugbo gumikan sa nabaniog nang madanihon niining suroyanan.
Sumala pa ni Dr. Alex Junia ang Presidente sa Philippine Heart Association Cebu Chapter sa pagbisita niini sa buhatan ni Gov. Gwen Garcia sa miaging adlaw nga nasibot sila sa pagpahigayon dinhi sa ilang tigum tungod kay nadungog nila ang kamaayo sa pagdumala ni Gov. Garcia sa lalawigan.
"This year is the year for Philippines to host the event because the presidents of the different countries had specifically chosen Cebu as its venue,” matud pa ni Junia. Midugang siya nga mokabat sa 1,500 ang gibanabanang gidaghanon sa mga delegado nga gikan sa nagkalainlaing nasud sa gawas nga motambong sa maong tulo ka adlaw nga konbensyon.
Pipila sa mga nasud nga ilang gigikanan mao ang Indonesia, Vietnam, Malaysia, Singapore, Pakistan ug Ghana sa Africa.
Nasayran nga ang tumong sa maong kalihukan mao ang pagpausbaw sa ilang kaalam sa profession nila isip cardiologist.
Busa mapasalamaton kaayo si Junia sa gihatag nga ayuda ni Gobernador Gwendolyn Garcia sa nahisgutang kalihukan. – BANAT NEWS
- Latest
- Trending
