Laing sunog miigo sa Mandaue

CEBU, Philippines - Mokabat sa P1 milyones ang danyos sa ikaduhang sunog nga nahitabo niadtong milabay’ng Huwebes sa gabii diha sa sitio Centro, barangay Labogon sa dakbayan sa Mandaue human sa pagkasunog usab sa 20 ka balay sa Perez Compound sa dalan Plaridel sa barangay Alang-Alang sa dakbayan sa Mandaue nga mikabat sa P480,000 ang gibiling danyos niini.

Si Mandaue City Fire Marshall Rogelio Bongabong ang mipaubos sa 3rd alarm sa sunog sa barangay Labogon lakip sa miabag sa operasyon ang mga sakop sa Filipino Chinese Fire Brigade, kabomberohan sa dakbayan sa Sugbo, sa Lapulapu, Consolacion ug uban pa.

Gitataw ni Bongabong nga milungtad og usa ka oras ang pagkombate nila sa kalayo tungod sa kahagip-ot sa agianan. 

Matud pa ni FO3 Cefriano Codilla, imbestigador sa kabomberohan sa dakbayan sa Mandaue nga sa iyang gihimong pakisusi nagsugod ang kalayo sa bamboo craft factory nga nahimutang sa luyong bahin sa panimalay nga gipanag-iya ni Atty. Benjamin Tomimbang kinsa kasamtangang nagbakasyon sa nasud sa Canada.

Dugang pa niya nga nalakip usab sa pagkaugdaw ang kongkretong panimalay nga gipanag-iya ni barangay Konsehal Fructuso ‘Tosing’ Agbay nga ang pikas habig ang giabangan usab sa usa ka rattan factory.

Si barangay Kapitan Damaso Tumulak kansang panimalay nahimutang 200 ka metro gikan sa nasunogan nga nahinabi sa Banat News miingon nga naglisod sa pagpawong sa kalayo ang mga bombero tungod sa kahagip-ot sa agianan sa maong dapit.

Sumala pa niini adunay gibana-banang 40 ka pamilya ang naapektahan sa maong sunog.

Matud pa niya nga base sa iyang kaugalingong pakisusi sa mga molupyo nga kasikbit usab sa nasunog nga bamboo craft factory giingong adunay nagluto diha sa yuta ug posibleng nakalimtan sa pagpawong.

Matud pa ni Tumulak nga 90 porsiyento sa mga biktima ang mga lumad nga molupyo sa maong dapit ug nagpuyo kini sa kaugalingong luna nga kabilin pa sa ilang katigulangan.

Dugang pa niya nga ang mga biktima nga nawad-an sa ilang panimalay ang kasamtangan lamang nga gipahiluna sa kapilya nga nahimutang sa sikbit usab sa maong dapit isip temporaryo nilang pinuy-anan.

Ang buhatan sa city social welfare sa Mandaue miapod-apod na og ready to eat nga pagkaon sa mga nasunogan sa duha ka barangay nga molungtad kini og tulo ka adlaw. Si Mayor Jonas Cortes personal nga misusi sa kahimtang sa mga biktima.  – BANAT NEWS