Hot meat gisakmit

CEBU, Philippines - Mikabat sa 81 kilos nga karneng baboy nga gituohang makalanag nasakmit sa mga otoridad gikan sa usa ka stall holder sa Consolacion Public Market niadtong Lunes sa buntag.

Ang tindera nga gisakmitan og paninda giila nga si Catherine Capadiso, lumad nga taga Consolacion ug nanag-iya og pwesto sa karnehan sa maong merkado. Ang inspection team nga gilangkuban nila ni Helen Capangpangan, Market Supervisor, Nerissa Barazan, Meat Inspector ug Helen Evangeline Puao, Municipal Agriculturist maoy misakmit sa giingong 81 ka kilos nga karne human kini nila mapamatud-i nga makadaot sa lawas sa tawong makakaon niini. 

Kini dihang nasuta sa mga meat inspector ang kabaho ug kalagom sa unod sa maong mga karne nga dili na angayang kaunon sa tawo. Matud pa ni PO1 Ricafort sa kapolisan sa Consolacion nga wala mahalin ang maong karne, apan gihipos kini sa suspetsado aron ibaligya og balik .

“Sa una,150 kilos kapin gyud to ang nakuha gikan niya. Maayo gani na karon nga niubos-ubos ngadto sa 81 kilos”, nagkanayon si Ricafort.   -– BANAT NEWS