Hepe sa CAIB makigsulti sa lider sa Muslim

CEBU, Philippines - Makigtagbo sa dili madugay ang tsirman sa Cebu City Anti-Indecency Board (CAIB) nga si Dr. Lucelle Mercado   sa mga lider sa Muslim dinhi sa siyudad aron hisgotan ang ilang mga programa batok sa mga malaw-ay nga salida sa DVD.

Nagkanayon si Mercado nga importante kaayo ang kooperasyon karon sa mga lider sa Muslim alang sa maong kampanya sanglit pipila sa mga sakop sa maong pundok, nag-negosyo og mga DVD sa kadalanan. “Maminaw ta sa ilang habig ug dili man gud ta gusto nga maguba ang negosyo sa mga mamaligyaay og DVD , ang ato lang nga dili ta mosugot nga molapas na pud sa moralidad ang ilang gipangbaligya. Mangayo pud ta nila (Muslim leaders) og mga suggestion alang sa mga pamaagi sa pagsumpo niini   ug manginahanglan gyud ta sa ilang kooperasyon, ” nagkanayon si Mercado.

  Human sa sunod-sunod nga operasyon sa CAIB sa pagsakmit sa mga malaw-ay nga mga salida sa DVD sa kadalanan, aminado si Mercado nga aduna gihapo’y ubang mga negosyante ang mibalik sa pagpamaligya niini.

Gumikan niini, mibahad si Mercado ngadto sa mga namaligya og pornographic material   nga molusad ang ilang grupo og mga surprisa nga pagpangronda aron mahunong na ang pagpakatap og kopya sa mga sex videos.

Dugang pa ni Mercado nga aduna sila’y nadunggan nga report nga adunay pabrika dinhi sa Sugbo nga maoy tiggama sa mga law-ay nga kopya sa DVD ug gipanag-iya sa mga langyaw busa mao usab kini ang usa sa gitutokan sa ilang grupo.  – BANAT NEWS