25 ka balay ugdaw

CEBU, Philippines - Mikabat sa 25 ka balay ang naugdaw, samtang may lima nga igo lang nakan-an sa kayo sa sunog nga miigo didto sa sitio Bildohan sa barangay Looc nga nahimutang sa sikbit nga bahin sa Mandaue City Jail ug sa Land Transportation Office (LTO) 7 kagahapon sa buntag.

Ang sunog unang namatikdan sa jailguard nga gidestino sa roof top sa bilanggoan busa mipahibawo dayon sa iyang mga kauban kinsa mihimo gilayon og mga lakang sa pagsiguro sa kagatosan ka mga binilanggo nga gitanggong sa maong bilanggoan.

Si Jail Warden Jessie Calumpang nga nasayod sa maong insidente mipalihok gilayon sa iyang fire brigade sa bilanggoan nga gilangkoban sa mga jail personnel ug mga trustee pinaagi sa pagkuha og tubig.

Unya gitabangan nila og bubo og tubig ang mga balay nga nahimutang sikbit sa fire wall sa bilanggoan aron nga dili kan-on sa kayo ang bongbong sa prisohan

Si FO3 Ceferiano Codilla, imbestigador sa kabomberohan sa maong dakbayan nga nahinabi sa Banat News miingon nga ilang nadawat ang alarma alas 8:28 ang takna kagahapon sa buntag ug ilang nakontrolar ang sunog human sa 20 minutos.

Matud pa ni Codilla nga sa ilang pag-abot sa maong dapit naugdaw na ang 25 ka mga balay ug gisugdan na usab sa pagkaon sa kayo ang laing duha ka balay apan napawong nila og dali busa wala kini maugdaw.

Sa imbestigasyon ni FO3 Codilla iyang nasuta nga nagsugod ang kalayo sa kisame sa ikaduhang andana sa panimalay nga ginama sa nipa ug amakan nga gipanag-iya ni Alfredo Apaap ug ang danyos sa maong sunog iyang gibanabana sa kantidad nga P490,000.

Si Marites Brigoli kinsa nalakip usab sa mga biktima mitug-an kang PO3 Codilla nga nakabati sila og mga buto-buto sa kisame sa ikaduhang andana sa balay ni Apaap ug ilang gituohan nga gikan kini sa ceiling fan nga mi-overheat nga maoy nakaingon sa pag-ulbo sa kayo.

Si FO3 Codilla miingon nga si Fire Chief Inspector Rogelio Bongabong nga maoy city fire marshall sa maong dakbayan mipaubos sa maong sunog sa second alarm nga maoy hinungdan nga miabot usab ang kabomberohan sa dakbayan sa Lapulapu, lungsod sa   Consolacion, Cordova, dakbayan sa Sugbo, barangay Tipolo, dakbayan sa dakbayan sa Mandaue, Filipino Chinese Fire Brigade, Accident Cortrol and Rescue Team (ACERT) San Miguel Corporation (SMC) ug Emergency Rescue Unit Foundation ( ERUF) nga mitabang og pawong sa kayo.

Si Mayor Jonas Cortes miingon nga ang mga biktima nga nagpuyo sa luna sa kagamhanan hatagan gihapon og pagtugot sa pagbalik og tukod sa ilang balay apan gikinahanglan lamang ang paghapsay niini. – BANAT NEWS