Visual artist napalgang patay

CEBU, Philippines - Usa ka visual artist napalgan nga wala nay kinabuhi sulod sa iyang giabangan nga lawak sa Najarro Compound, F. Sotto Drive sa barangay Camputhaw ning dakbayan kagahapon sa kaadlawon.

Ang namatay giila sa kapolisan nga mao si Renato ‘Boy” Sagario, 68, ulitawo, usa ka visual artist ug   magtutudlo usab sa nahisgutang barangay.

Sa pasiunang imbistigasyon sa kapolisan nasayran nga katapusang nakit-an si Sagario niadto pang Lunes sa hapon.

 Usa ka Crisanto Carbonero, caretaker sa balay maoy nagpahibalo sa tag-iya sa compound nga dunay dili maayong baho nga migawas sa kuwarto sa biktima.

Tungod niini daling giablihan ang giabangan nga kuwarto sa biktima ug maoy misugat sa ilang panan-aw nga nagbuy-od na ang biktima ibabaw sa gihigdaan niini nga kama.

Dali silang nanawag sa mga sakop sa Crime Scene Investigation (CSI) ug napunit nila ang usa ka cell phone, pitaka nga dunay sulod nga P500 nga gipanag-iya ni Sagario.

Hinuon ang kapolisan walay nakitang foul play sa kamatayon ni Sagario, apan ila kining gipa-autopsy aron masuta kun gipatay ba kini og tuyo.  – BANAT NEWS