Warning batok energy saving device

CEBU, Philippines - Gipasidan-an sa kagamhanan ang publiko batok sa mga baligya nga energy saving device (ESD) nga dili tinuod nga makadaginot kini sa konsumong kuryente .

Ang pasidaan gihimo ni Regional Director Antonio Labios sa Department of Energy (DOE)7 kinsa nagkanayon nga gawas nga dili tinuod nga makadaginot kini sa konsumo sa kuryente, labaw sa tanan makaguba pa gyud sa taoran nga appliance niini.

Tungod kay usa man ka pagpanglingla sa pumapalit ang gipasigwar sa mga label niining mga baligya, giawhag ni Division Chief Zaide Bation sa Department of Trade and Industry (DTI)7 ang publiko nga kun mosang-at mo og kiha   ngadto sa DTI batok sa mga nagpabrika ning mga baligyang ESD, andam ang DTI sa tanang higayon sa paghimo og lakang batok sa respondente.

Ang duha ka mga dagkung opisyal sa DOE ug DTI pinasidunggang dinapit sa Kapihan sa PIA nga tinambayayongan pagpasiugda sa Philippine Information Agency (PIA) ug sa DYMR Radyo ng Bayan.

Matud pa ni Labios nga ang mga pagsuway nga gihimo ngadto sa mga gibaligyang ESD nagpamatuod nga wala gyuy epekto ang maong baligya.

Sumala sa gipasalig sa label niini nga mohinay ang tuyok sa metrohan sa kuryente kun patangagan og ESD ang usa ka appliance sama sa plantsa, telebisyon ug uban pa, si Labios nagkanayon nga wala kini kamatuoran.

Apan ang labing tinuod matud pa niya, mao nga suwerte na kaayo ang usa ka appliance nga paungotan og ESD nga dili maguba .

Kini tungod kay nasinatian na nila gikan sa mga nakapalit og ESD nga kutob sa mga appliance nga gitaoran niini, wala gyud maglangan naguba gyud ug gilabay nalang sa basurahan.

Si Bation usab sa iyang bahin miingon nga bisan nasayod sila nga pagpanglingla kining mga baligyang ESD, miawhag sila sa publiko nga kinahanglang mosang-at sila og reklamo ngadto sa buhatan sa DTI aron makahatag dayon ang maong ahensya og tukmang lakang sa paggukod niadtong mga nagpabrika og ESD. (BANATNEWS)