Dinasmagay sa polis vs. polis 1 angol

CEBU, Philippines -  Samdan ang usa ka polis nga nagsakay og motorsiklo human niini makabangga ang usa ka multicab nga gimaneho sa lain usab nga polis pasado alas-10 sa buntag kagahapon sa barangay East Poblacion lungsod sa Naga.

Ang samaran nailhan nga si PO2 Cristino Canono nga nagmaneho sa iyang motorsiklo samtang ang iyang gikabangga mao si PO1 Diosdado Paunil nga nagmaneho usab sa iyang multicab, ang duha pulos nadestino sa lungsod sa Naga.

Base sa gipadalang text message ni Sr. Supt. Erson Digal, direktor sa Cebu Provincial Police Office dinhi sa Banat News, ang duruha nagkasugat diha sa usa ka blind curve nga dalan ug parehong wala makabantay sa ilang gikasugat hinungdan sa panagbangga.

Si Canono daling gitabang ug gidala sa South General Hospital ug nakaangkon og grabeng kadaot sa lawas samtang si Paunil nga wala maunsa sa aksidente kasamtangang gi-imbestigar bahin sa nahitabo.

Liso og pangisip nadasmagan, patay

Patay na nga nahidangat ngadto sa tambalanan ang usa ka babaye kinsa giingong adunay deperensiya sa pangisip human kini mabanggai og motorsiklo niadtong Sabado sa gabii didto sa barangay Langtad, lungsod sa Argao.

Sa maong insidente ang sayes-anyos nga batang lalaki nga anak sa drayber sa motorsiklo naangol usab.

Ang kapolisan miila sa biktima nga si Cora Remonde, hingkod ang panuigon, residente sa maong lugar kinsa giingong kuwang sa pangisip ug gikataho usab nga hubog niadtong higayona dihang mitabok kini sa karsada.

Ang suspetsadong drayber kinsa nagtingkagol karon sa Argao detention cell mao si Artemio Pantinople Jr, 28-anyos, taga barangay Jampang sa nahisgutang lungsod, drayber sa Rusi nga motorsiklo kolor itom nga nagtangag sa plakang 2330 nga walay mga litra.

Ang anak ni Pantinople nga si James Ryan nakaangkon kini og mga pangos sa lawas human sila mangatumba diha sa karsada. Si PO1 Marvin Chin, duty desk office sa Argao Police Station nga nahinabi sa Banat News kagahapon nagkanayon nga si Pantinople nagbiyahe gikan sa barangay Jampang ug adunay kargang usa ka container nga tuba ug angkas usab niya si James Ryan sa wala pa mahitabo ang insidente.

Apan pag-abot diha sa lugar nga nahitaboan si Remonde kinsa giingong hubog kalit nga mitabok sa karsada hinungdan nga nabanggaan gyud kini. Matud ni Chin nga sa ka kusog sa impact natumba sa karsada si Remonde ug nalatayan sa motor.

Ang motorsiklo ni Pantinople natumba usab kini ug naglagpot diha sa karsada ang iyang anak ug swerte kay mga pangos lang sa lawas ang naangkon sa bata.

Samtang si Remonde nakaangkon kini og grabeng kadaot sa ulo ug lawas tungod sa iyang pagkabunal diha sa karsada. (BANATNEWS)