3 ka tawo mitulis sa kainom

CEBU, Philippines - Tulo ka mga giingong tulisan kinsa gipasanginlang miunay og tulis sa ilang kainom ang nasikop sa mga polis sa miaging kaadlawon diha sa sitio Neighborhood, barangay Tabunok, dakbayan sa Talisay.

Ang biktima mao si Jeffrey Nargas, 26, mangayohay og mga cellphone diha sa Tabunok, taga sitio Kimba, barangay Cansojong sa nahisgutang siyudad.

Ang mga suspetsado mao ang mag-agaw’ng Eduardo Villaro alyas “Jorge” ug Dennis Villaro ug Rogelito Rabadon parehong nagpanuigon ngadto sa 18-anyos ug mga residente diha sa sitio Neighborhood ug giingong mga sakop sa “Crips gang”.

Usa ka residente diha sa sitio Neigborhood ang mi-report sa mga polis kabahin sa maong hitabo hinungdan sa pagkasikop kanila ni PO1 Cecilo Reyes, PO1 Vincent Mary Arboladora ug PO1 Rogelio Gutang Jr. nga daling mitubag sa maong alarma.

Ang tulo nasikop diha sa lugar nga nahitaboan ug nakuha gikan kang Villaro ang duha ka linikit nga marijuana ug usa ka cellphone, laing duha ka linikit nga marijuana ug laing cellphone ang nakuha gikan ni Dennis ug upat ka linikit nga marijuana gikan sa posisyon ni Rabadon.

Si Rabadon nga nahinabi sa Banat News kagahapon mibutyag nga higala nila ni Nargas ug ang mag-agaw’ng Villaro ang mitulis sa biktima apan ang duha mipasangil usab ni Rabadon maoy utok sa tanan. – BANAT NEWS