Babayeng 'pusher' sikop

CEBU, Philippines - Babayeng giingong notadong drug pusher nahulog sa mga kamot sa City Anti Illegal Drugs Special Operation Task Force (CAIDSOTF) atol sa usa ka buybust operation sa Basak Merkado, sa barangay Basak dakbayan sa Lapulapu sa milabay’ng gabii.

 Ang nasikop mao si Elvira delos Santos Abella, 32, residente sa maong dapit ug giilang notadong drug pusher sa maong dapit.

 Matud pa ni Insp. Antonio Detuya ang hepe sa Intelligence Section ug CAIDSOTF sa kapolisan sa Lapulapu dugay na nilang gipanid-an si Abella sa iyang ilegal nga pagpayuhot sa ilegal nga drugas (shabu) diin posibleng mao kini ang kuhaanan og drugas sa ubang mga pushers sa dakbayan.

 Gumikan niini si Insp. Glen Hife ang deputy chief sa CAIDSOTF mihimo og buybust operation batok ni Abella sa milabay’ng gabii.

 Atol sa ilang operasyon ang decoy sa kapolisan nga nagdala og balor P500 nga buybust money ug human makapalit og usa ka medium nga pakete sa gituohang shabu dali nga gisignit si Abella sa kapolisan.

 Atol sa paghiling sa lawas ni Abella nakuha diha sa posesyon niini ang laing lima ka dagkong pakete ug lima ka medium nga pakete nga gidudahang pulos shabu ang sulod ug ang 10 ka 100 bills nga gituhuang halin sa pagpamaligya sa illegal nga drugas.

 Nakuha usab ang balor P500 nga marked money sa maong operasyon.

 Si Abella sa report sa Buena Mano sa GMA News mihimakak nga iyaha ang maong ilegal nga drugas. Si Abella gibalhog sa Lapulapu City Police detention cell ug gikatakdang pasakaan og kasong kalapasan sa RA 9165 ubos sa Sec. 5, 11 ug 12 sa Art. II.   – BANAT NEWS