Mitago nahutda'g dugo patay

CEBU, Philippines - Patay ang usa ka 23-anyos nga lalaki kinsa giingong nahutdan og dugo tungod kay wala kini magpadala dayon ngadto sa tambalanan human mapusili kagahapon sa kaadlawon diha sa sitio Mananga barangay Tabunok, dakbayan sa Talisay.

Ang mga biktima giila sa mga polis nga si Abelito Cabuenas Lopez ug Dola Jason Andola, 17, parehong mga residente sa nahisgutang lugar samtang gipangita pa sa kapolisan ang duha ka wala mailhing mga lalaking namusil sa mga biktima.

Si PO2 Henry Mata kinsa usa sa mga miresponde sa hitabo nga nahinabi sa Banat News kagahapon mibutyag nga mga alas 12:50 kagahapon sa kaadlawon ang mga biktima nagtan-aw og billiards dihang duha ka wala mailhing mga lalaki ang kalit lang mitungha ug namusil kanila.

Si Lopez nakaangkon kini og samad pinusilan sa tuong paa samtang si Andola nakaangkon usab og usa ka samad pinusilan sa iyang buko-buko.

Matud ni Mata nga base sa ilang pasiunang imbestigasyon si Lopez wala dayon madala sa tambalanan tungod kay mitago pa kini diha sa usa ka balay ug mga ala-una pasado na sa kaadlawon na misinggit nga nangayo og panabang apan walay bisan usa nga miduol nga silingan tungod kay nangahadlok.

Ang inahan ni Lopez pagkasayod sa nahitabo mao nay midala niini ngadto sa Talisay City District Hospital apan wala na kini makaabot pa nga buhi tungod kay giingong nahutdan kini sa dugo.

Si Andola nadala diha sa TCDH apan tungod sa kahimtang niini gibalhin ngadto sa Vicente Sotto Memorial Medical Center.

Si Mata mibutyag nga base sa ilang nadawat nga report ang mga biktima giingong mga barkada nila ni Ferdinand Santos alyas “Nanan” ug Oliver Honor.

Kahinumduman nga si Santos ug Honor kinsa giingong mga notadong tulisan ang miunay sa pagdunggab patay sa giingong usa nila ka kauban nga si Richard Sarip niadtong Biyernes sa kaadlawon. Ang tulo parehong mga residente diha sa sitio Mananga.

Si Mata midugang nga niadtong Lunes sa sayo sa buntag ang nahisgutang mga lalaki nangita nila ni Santos ug Honor. Ang kapolisan mipahigayon og followup nga imbestigasyon sa insidente. – BANAT NEWS