2 balay natabunan

CEBU, Philippines - Duha ka mga balay ang natabunan sa nahitabong landslide kagahapon sa hapon sa sitio Laguerta, sa barangay Lahug ning dakbayan human usa ka punoan sa kawayan ang naibot lakip na ang nahagsang mga bato gumikan sa kahumok sa yuta.

Swerteng nakabantay nang daan ang duha ka pamilyang Tecson ug Magsoling sa La Guerta maong walay dautang nahitabo sa ilang mga kabanay atol sa pagkahagsa sa ilang mga panimalay.

Sumala pa nila, daan na silang nagdudang dili magdugay mahagsa sa ilang panimalay ang maong punoan sa kawayan nga daw nagkumpayot nalang sa yuta nga hinay-hinay usab nga nangalusno paubos tungod sa kahumok na niini bunga gihapon sa pagbunok sa uwan ning nanglabay’ng mga adlaw.

Kagahapon sa udto, si Dante mipasidaan na sa iyang asawang si Lilibeth ug ang iyang siyam ka mga anak nga dili na magpundo sa ilang balay. Ang mga bata ug ang iyang kapikas diha na magpasilong sa ilang kusina nga buwag sa ilang balay.

Samtang sila nagluto og paniudto nakadungog si Lilibeth og paka gikan sa kawayanan ug dihang iyang gilingi nahagsa na kini uban sa yuta ngadto sa ilang balay. Ang balay nga ginama sa kahoy nahapla lakip na ang balay sa silingang si Tecson natabunan og yuta ug mga bato.

Si Lahug barangay kapitan Mary Ann delos Santos uban sa iyang mga opisyales daling miadto sa lugar ug pagkahapon mipadala og mga housing materials aron matukod og balik sa naapektahang pamilya ang ilang pinuy-anan.

Samtang sa susamang higayon laing landslide ang nahitabo diha sa sitio Tagaytay, sa barangay Kalunasan nga napadulong sa dalan hinungdan nga nakabalda kini sa kadalanan apan wala hinuoy panimalay nga naapektohan niini. 

Laing landslide ang giingong nahitabo diha sa barangay Binaliw nga nakabalda gihapon sa agianan sa mga sakyanan hinungdan nga mipadala og payloader ang dakbayan sa maong dapit aron maablihan ang dalan. Samtang midahili usab ang pipila ka parte sa rip-rap nga nahimutang sa Singson, sa Guadalupe hinungdan nga gipa-evacuate ang mga tawo nga nanimuyo sa maong dapit. (BANAT NEWS)