'Nalisoan' gipusil tipi

CEBU, Philippines - Usa ka gituohang nalisoan sa pangisip ang gipusil ug namatay diha na sa atubangan sa tambalanan human gipagawas sa mga doktor sa miaging buntag diha sa lungsod sa Tuburan.

Ang namatay wala pa gihapon mailhi sa kapolisan apan giingong napusilan kini sa usa ka wala mailhing tawo diha sa dalan C. Parilla sa maong lungsod sa miagi pang Martes sa gabii.

Ang wala hiilhing biktima adunay igo sa bala diha sa bukton gihatod sa kapolisan sa Tuburan District Hospital apan gumikan kay dili man peligro ang iyang samad, gipagawas kini dayon sa maong tambalanan pagkabuntag.

Apan giingong wala kini molakaw ug nag-estambay atubangan sa tambalanan hangtod nga giduol kini sa usa ka Efren Flores nga sakop sa Civil Security Unit.

Sumala pa ni Flores ngadto sa kapolisan gitug-anan siya sa biktima nga siya taga Bantayan, apan tunga-tunga sa ilang panagtabi kalit kining nagmulo nga sakit iyang ulo ug nagsuka-suka.

Hinungdan nga mibiya si Flores aron mokuha og tubig apan sa iyang pagbalik patay na kini. Ang kapolisan nagpaabot pa sa tagtungod sa maong lalaki.  – BANAT NEWS