HLURB nasayop - Sepulveda

CEBU, Philippines - Ang kagamhanan sa probinsiya sa Sugbo mitumbok nga ang regional director sa Housing and Land Use Regulatory Board (HLURB) nasayop sa iyang pagtumbok nga sila maoy maningkamot aron mogawas ang deed of sale sa 559 ka mga benepisyaryo nga nakabayad na sa lote ubos sa Provincial Ordinance 93-1.

Sumala pa ni Capitol Consultant on Information Rory Jon Sepulveda nga dili tinuod ang gitumbok ni HLURB 7 Regional Director Alixes Roy Lopez nga may kapin sa 500 ka mga benepisyaryo nga wala kahatagi og deed of sale sa Kapitolyo bisan kun hingpit na kining nakabayad sa lote.

Giklaro ni Sepulveda nga sigun sa ilang record ,nga sa 4,364 ka mga benepisyaryo, 1,445 lamang ka mga nagpuyo ang hingpit nang nakabayad sa Kapitolyo ug ang 749 niini ang nahatagan na og land title ug deed of sale sa administrasyon pa ni kanhi gobernador ug karon 2nd district Congressman Pablo Garcia.

Iya usab nga giklaro nga sa unom ka tuig ni Gov. Gwen Garcia nahatag usab niini ang deed of sale sa 452 ka mga benepisyaryo hinungdan nga ang nahibiling wala kahatagi sa maong deed of sale 244 na lang , ug dili 559 ka mga benepisyaryo.

Gitin-aw usab sa tigpamaba sa Kapitolyo nga ang gobernadora buot unta nga mo-apod-apod na sa maong deed of sale sayo niining tuiga apan tungod sa naghinangat nga election niadtong Mayo 10, wala una kini idayon ug karong nagkaduol na usab nga barangay election giuswag na usab sa gobernador ang pag-release niini.

Apan niingon si Sepulveda nga ang gobernadora misaad nga human sa election sa barangay ihatag na niini ang tanang deed of sale sa mga benepisyaryo.

Mitambag si Sepulveda ngadto kang konsehal Allan Dizon nga maghinayhinay sa pagpanulti og walay kamatuoran kay basin siya na usab maoy mahimong hinungdan nga mabulabog ang padayong negosasyon sa 93-1. (BANATNEWS)