28 ka barangay sa watchlist

CEBU, Philippines - Gumikan sa nagkaduol na ang piniliay sa Barangay ug Sangguniang Kabataan (SK) karong Oktubre 25, ning tuiga, ang kapolisan dinhi sa tunga-tungang Kabisay-an mibutyag nga adunay 28 ka barangay sa Central Visayas ug laing tulo ka lungsod dinhi sa probinsya ang ilang ipaubos sa Election Watchlist.

Atol sa Talakayan sa Isyung Pulis (TSIP) forum sa miaging Miyerkules sa media center sa Kapolisan, si Chief Supt. Ager Ontog Jr. Regional Director sa kapolisan dinhi sa Central Visayas mitug-an nga 25 ka barangay didto sa Negros Island ug tulo sa lalawigan sa Bohol ang posibleng ipaubos nila sa election watchlist.

Apan giklaro hinuon ni Ontog nga subject for verification pa kining maong mga barangay sanglit nakadawat sila og report nga adunay presensya sa rebeldeng New Peoples Army (NPA) ang maong mga dapit.Ang Comelec ug kapolisan mitataw nga aduna silay gisunod nga kategoriya sa level one , nga mao ang intense political rivalry samtang ang level two adunay presensya sa insurhensya, diin ang 28 ka barangay sa Negros Island ug Bohol anaa mahimutang sa level one.Matud ni Ontog nga gikuhaan nila og basehanan sa mga nangaging piniliay ug niadtong piniliay sa bulan sa Mayo diin kining 28 ka barangay adunay init sa panagribal sa politika ilabina na kining eleksyon sa barangay.

Samtang midugang ang kasamtangang hepe sa Regional Intelligence Division (RID) nga si Supt. Patrocinio Comendador nga adunay laing tulo ka lungsod sa lalawigan sa Sugbo ang anaa usab sa Level one kon intense political rivalry sa mga milabay nga election.Kini maoy hinungdan nga ila pa usab kining himuan og pakisusi hangtud nga mahuman ang pagsang-at sa Certificate of Candidacy (COC) sa mga gustong modagan sa piniliay sa barangay. Si Ontog wala mosalikway sa posibilidad nga adunay mga drug personalities sa kalungsoran kinsa mosuporta sa usa ka kandidato hinungdan nga iya karong gipapanid-an sa iyang mga sakop kun si kinsa kining mga tawhana.

Matud ni Ontog nga dili malikayan nga duna gyuy mga drug pusher nga mohatag og kuwarta sa mga kandidato nga buot nilang suportahan ug maninguha nga ila gyud kining padag-on aron aduna nay makapanalipod sa ilang negosyo. Sa iyang bahin si Acting Regional Director, Veronico Petalcorin sa Comelec 7 nagkanayon nga ang buhaton nalang sa kapolisan mao ang pag-intensify sa ilang operasyon kutob sa mga report nga ilang madawat aron madakpan kining mga drug pusher nga naglihok karon sa mga lalawigan.(Uban sa report ni Edwin Ian Melecio) (BANATNEWS)