Ex-convict gipusil patay

CEBU, Philippines - Naglunang sa kaugalingong dugo ang usa ka mag-uuma nga ex-convict apan nagbinuotan na human mapusili sa wala mailhing mamumuno kagahapon sa ala una sa kaadlawon sa barangay Dugyan, lungsod sa Dalaguete.

Ang biktima nailhan nga si Mario Alcomendras, 60, molupyo sa barangay Caleriohan sa maong lungsod ug usa ka mag-uuma.

Sa pakighinabi sa Banat News kang PO2 Godofredo Glipa sa Dalaguete Police Station, mibutyag kini nga samtang naglakaw ang biktima paingon mouli sa ilang balay giingong gisundan kini sa mamumuno.

Sa dihang naabot na sa maong lugar kalit lang gipusil sa mamumuno ang biktima ug nakaangkon og samad pinusilan sa iyang walang dughan ug walang bukton.

Samtang sa pakighinabi na usab sa Banat News sa imbestigador nga si SPO1 Edwin Quilaton mibutyag kini nga adunay grupo sa batan-on nga miagi sa maong lugar nga nakakita sa biktima nga naglunang sa kaugalingong dugo.

Matud pa ni PO3 Quilaton nga sa dihang ilang girespondehan ang maong insidente ila nang naabtan ang biktima nga wala nay kinabuhi ug naglunang sa kaugalingong dugo.

Si PO3 Quilaton miingon nga posibleng natripan lang sa mga “walay lingaw” si Alcomendras.

Gihulagway usab ni PO3 Quilaton nga adunay gibana-bana nga 50 metros lang ang gilay-on sa crime scene ug sa panimalay sa biktima.

Si Alcomendras, matud ni PO3 Quilaton, nakonbikto na og krimen sa bata-bata, apan nagbinuotan na. Siya ug ang iyang bugtong anak ang nagtipon og puyo sa ilang balay sa dihang namatay ang asawa niini niadtong 2003. – BANAT NEWS