Mitulis patay sa taga MEPZ nasikop

CEBU, Philippines - Nasikop ra sa kapolisan ang duha ka suspetsado nga mitulis ug midunggab patay sa usa ka empleyado sa MEPZ didto sa Barangay Pajo, dakbayan sa Lapulapu sa milabay’ng adlaw.

 Ang nasikop mao sila si Marlon Quilantang, 23, nga taga Sitio Acacia ,Brgy. Pajo ug ang usa ka 15 anyos nga bayong-bayong nga taga Sitio Humayhumay, Brgy. Gun-ob, pulos sa dakbayan sa Lapulapu.

 Matud pa ni SPO2 Rolito Jumao-as sa Homicide section sa kapolisan sa Lapulapu, nga nasikop nila ang duha sa gihimo nilang hot pursuit operation human tulisa ug patya niini si Arjie Panuncial, 27, ulitawo, nga empleyado sa MEPZ niadtong Septiyembre 8 sa kaadlawon didto sa Maximo Patalinjug Avenue dakbayan sa Lapulapu.

 Matud ni Jumao-as nga unang nasikop ang bayong-bayong ug gisunod usab si Quilantang didto sa ilang panimalay sa Pajo.

 Ang pagdakop kang Quilantang nahimo human motug-an ang bayong-bayong ngadto sa kapolisan .

Matud pa sa maong batan-on nga si Quilantang maoy miluba kang Panuncial dihang nagdumili ang biktima sa paghatag sa iyang kuwarta atol sa maong hold up.

 Ang biktima nakaabot gyud sa tambalanan apan human sa pipila ka takna nakabsan kini sa kinabuhi gumikan sa mga samad linubaan nga iyang naangkon.

 Kasong Robbery with Homicide ang atubangon ni Quilantang samtang ang 15 anyos nga dinakpan gitugyan na sa kapolisan ngadto sa DSWD. – BANAT NEWS