Polis nga nakapatay og sibilyan gidepensahan

CEBU, Philippines - Gi-depensahan sa iyang labaw ang polis nga nakapatay sa kanhi sakop sa Civilian Volunteers Organization (CVO) niadtong Sabado sa hapon didto sa Cantuod ,lungsod sa Balamban.

Si Sr. Supt. Ramon Rafael, hepe sa Criminal Investigation and Detection Group (CIDG)-7 miingon nga lihitimo ang gihimo ni PO3 Artemio Tumakay Jr nga nakapusil patay kang Agapito Cuizon, kanhi sakop sa CVO.

Matud ni Rafael nga nahimo kadto ni Tumakay tungod kay namilegro na ang iyang kinabuhi ug sa maong sitwasyon igo lang siyang midepensa sa kaugalingon sanglit wala nay laing opsyon pag-neutralized kang Cuizon.

Gidugang ni Rafael nga si Tumakay duty niadtong higayona human ang iyang labaw nga si Chief Insp. Fermin Armendares kinsa maoy provincial officer sa CIDG nga nagbase sa Bogo misugo kaniya sa pagpaniid sa plantasyon sa marijuana sa bukirang barangay sa maong lungsod.

Apan giklaro ni Rafael nga si Dennes Paradero dili nila asset kundili source of information kabahin sa plantasyon sa marijuana nga gipananom sa bukirang bahin sa Balamban.

Matud ni Rafael nga gawas nga dunay gihimo nga imbestigasyon ang local police sa Balamban sa maong hitabo mohimo usab sila og susamang imbestigasyon pagsuta niining tanan.

Gani miingon si Rafael nga lakip sa ilang himuon mao ang administrative aspect aron ilang makita kun asang dapita nakahimo og kalapasan si Tumakay.

Kini human nakadawat og impormasyon gikan sa Balamban Police nga matud pa buot untang dad-on sa mga tawo si Cuizon ngadto sa district hospital, apan si Tumakay kunoy mipugong hangtod nga nabugtoan gyud sa kinabuhi ang biktima nga wala makaabot sa hospital.

Si Rafael mitataw nga iya pang huwaton ang resulta sa imbestigasyon sa kapolisan sa Balamban ug sa CIDG una pa siya moluwat og hukom kun unsay ilang ipahamtang nga silot kang Tumakay.  (BANATNEWS)