Custom sa Sugbo pakyas sa koleksyon
CEBU, Philippines - Bisan napakyas ang Customs Port of Cebu (POC) sa ilang “target collection” sa bulan sa Agusto ning tuiga apan ang ilang katibuk-ang koleksyon gikan sa Enero, milapas pa gihapon sa ilang target.
Base sa talaan sa collection target matag bulan, unang higayon ning tuiga sa bulan sa Agosto nga napakyas ang POC sa ilang koleksyon kay mikabat lang sa P524,396,020.10 ang nakolekta nila, samtang ang target nga kolektahonon unta nila sa maong buwan, P606,127,000.
May deperensiya nga P81, 730,979.90 ug alakanse sila og 13.48 percent.
Matud pa ni Carlos Corsiga, ang Hepe sa Assessment Division sa POC nga ang hinungdan niini mao ang kagamay sa volume sa importasyon sa bulan sa Agosto.
Sukwahi sa milabay’ng mga tuig ang bulan sa Agosto maoy kasagarang isugod sa pagsaka sa importasyon hangtod na sa Disyembre apan lahi karong tuiga nga gamay ra ang importasyon sa Agosto nga misangpot usab sa kagamay sa ilang koleksiyon.
Samtang si Cebu Customs District Collector Ronnie Silvestre wala mabalaka sa maong sitwasyon gumikan kay milapas gihapon kini og 1 percent sa ilang katibuk-ang koleksiyon gikan sa Enero hangtud sa Agosto.
Matud pa ni Silvestre nga dako siya og pagtuo nga ilang makuha ang ilang target collection karong bulana pinaagi sa iyang economic team nga naglihok sa buhatan sa adwana. (BANATNEWS)
- Latest
- Trending
