CEBU, Philippines - Talandugon ang kahimtang sa usa ka tawo human kini pusila sa iyang silingan samtang nagtan-aw sa salida sa TV didto sa sitio Abuno, barangay Pajac, dakbayan sa Lapulapu sa miaging hapon.
Ang biktima mao si Danilo Ciatano, 38, nga taga Abuno, samtang ang suspetsado mao usab si Boyet Amistad, hingkod ug silingan sa biktima.
Sumala ni SPO2 Rolito Jumao-as sa Lapulapu Police Station nga samtang nalingaw sa pagtan-aw sa salida sa TV ang biktima, kalit lang miabot ang suspek dayong pamusil.
Gumikan kay nagtalikod, nasabak sa hawak ang biktima ug milapos ang bala sa .45 kalibreng pistola sa iyang tiyan.
Ang biktima gihatod dayon ngadto sa Vicente Sotto Memorial Medical Center sa dakbayan sa Sugbo, samtang misibat usab dayon ang suspetsado.
Nagtuo ang kapolisan nga pagdumot ang hinungdan sa maong pagpamusil ug padayon pa nilang gipangita karon ang suspetsado. (BANATNEWS)