'Hitman' sa Bloods nadakpan

CEBU, Philippines - Nasikop sa nagpatrolyang Field Training Police (FTP) ang usa ka batan-on nga giingong hitman sa Bloods Gang pipila ka minutos human kini namusil sa usa ka dispatser sa miaging alas 10 sa gabii diha sa dalan Sanciangko sa barangay Kalubihan ning siyudad.

Sila si PO1 Samuel Siasol ug PO1 Reneir Noel pulos FTP sa Operation Branch sa Cebu City Police Office nga nagbantay sa dalan Osmeña Blvd. ug dalan Sanciangko nagpatrolya niadtong higayona dihang nahitabo ang pagpamusil.

Ang gidakop mao si Luigi Lucero, 18, taga sitio Balagtas sa barangay Pahina Central kinsa nakuhaan sa iyang posesyon og usa ka automatic .45 nga kalibre sa armas, dunay upat ka buhing bala, holster ug usa ka syringe.

Si Lucero maoy gitumbok nga mipusil sa makadaghang higayon sa biktimang si Ryan Canseran, 21, taga sitio San Jose sa barangay Guizo sa dakbayan sa Mandaue nga usa ka dispatser sa jeepney sa nahisgutang lugar.

Subay sa pasiunang imbestigasyon sa kapulisan sa dakbayan nga sila si PO3 Witchel Berry, PO3 Julius Mabunay ug PO2 Michael Codaste naglakaw ang biktima dihang miabot si Lucero ug gipusil kini sa makadaghang higayon.

Ang biktima nga nakaangkon og daghang samad pinusilan sa kalawasan ug daling gisakay og taxi sa usa ka concerned citizen ug gihatod sa Cebu City Medical Center (CCMC).

Apan walay suwerte si Lucero sa dihang paingon na unta kining moikyas apan naabtan sa duha ka FTP police ug gisikop.

Si Lucero sa dihang nahinabi sa Banat News miangkong sakop siya sa nahisgutang gang ug mitug-an nga aduna silay karaang atraso sa biktima ug naatlan lang nga nagkaabot sila niadtong higayona. – BANAT NEWS