Testigo sa Reynes - ambush wala mamatay sa torture

CEBU, Philippines - Namatay ang usa sa mga testigos sa pag-ambush kang kanhi mayor Joselito “Kokoy” Reynes sa lungsod sa Compostela apan ang kapolisan mihimakak nga tinuyo ang kamatayon niini kundili mao ang problema sa panglawas ang nakaingon sa kamatayon niini.

Niadtong petsa 2 niining buwana didto sa barangay Estaca, Compostela Cebu.

Si Sr. Supt. Erson Digal hepe sa kapulisan sa probinsya nga nahinabi sa mga tigbalita miila sa namatay nga saksi nga si Sheina Marie Ester Maro,22, nga taga Compostela giingong namatay sa sakit nga toxic goiter nga mibuto sa sulod ug gidala unta sa Vicente Sotto Memorial Medical Center niadtong Agosto 18 sa gabii.

Sa unang migawas nga report, giingong gipatay pinaagi sa torture si Maro hinungdan nga gipasusi kini dayon ni Digal kang Sr. Insp. Ruben Cuizon hepe sa Provincial Investigation and Detective Management Branch (PIDMB) apan ilahang nadiskubrehan nga sakit sa panglawas ang hinungdan sa kamatayon niini.

“Ang report nga tortured dili na tinuod, toxic goiter niya nibuto didto sa ilawom,”pagklaro pa ni Digal.

Si Maro usa sa lima ka saksi sa pag-ambush kang Reynes niadtong Agosto 2 diha sa barangay Estaca sa lungsod sa Compostela ug usa sa miila sa drayber sa motorsiklo nga si Elly Ardita nga maoy gisakyan sa gipasanginlan usab nga gunman nga si Wilson Pasaol.

Si Ardita nadakpan human masigpati nga nagdala sa motorsiklong giingong maoy gigamit sa pag-ambush kang Reynes ug nasuta usab nga kini gikarnap duha ka tuig na ang milabay ug ang tag-iya gipatay.

Lakip sa gidakop kalabot sa maong ambush mao si Dominador Viloria Sr. nga gitumbok nga lookout, apan ang killer nga si Wilson Pasaol kanhi drayber sa ambulansya sa lungsod sa Compostela panahon nga mayor pa si Ritchie Wagas wala na igkita sa kapolisan.

Giklaro hinuon ni Digal nga ang pagkamatay ni Maro dili kini makaapekto sa kaso sanglit aduna silay vital witnesses nga kauban ni Maro. Matud pa ni Digal si Maro usa sa miila ni Pasaol nga maoy mipusil patay kang Reynes. – BANAT NEWS