Usbaw sa suholan sa CV ipublikar karon

CEBU, Philippines – Gipaabot nga ipublikar karung adlawa kun pila gyud ang naaprubahang dugang usbaw sa suholan alang sa mga mamumuo dinhi sa Sugbo ug tibuok Central Visayas.

Ang tsirman sa Regional Tripartite Wages and Productivity Board (RTWPB-7) ug direktor sa Department of Labor and Employment (DOLE-7) Elias Cayanong mibutyag nga labing minus P15 ang usbaw sa suholan apan dili usab kini molapas sa P25.

Nanghinaut si Cayanong nga mosabot ang sektor sa pamuo sa nakab-ot nga desisyon sa wage board tungod kay alang niya dili sayon ang proseso nga ilang giagian taliwala sa hugot nga pagsupak sa sektor sa mga magpapatigayon.

Sumala pa niini nga dili gyud unta mosugot ang mga negosyante nga mohatag og dugang usbaw tungod kay wala pa hingpit makarekober ang ekonomiya sa rehiyon human sa nasinati nga global financial crisis, ingon man sa nahatag nga negatibong epekto sa milabay’ng El Niño Phenomenon ingon man sa nasinati karung La Niña Phenomenon.

Gipaabot usab nga ipahibawo karung adlawa kun kanus-a moepekto ang pagpatuman sa dugang umento sa suholan.

Sayo niini ang Associated Labor Union ALU Trade Union Congress of the Philippines (ALU-TUCP) pinaagi ni Joy Lim misaway sa P15 ngadto sa P25 nga usbaw ug mihulagway niining susama ra og limos ngadto sa mga mamumuo.

Ang ALU-TUCP niduso og P100 across the board increase samtang ang Alliance of Progressive Labor ang P128 across the board wage increase. (BANATNEWS)