5-anyos gitigbas sa babaye

CEBU, Philippines - Samaran sa ulo ug kamot ang usa ka 5-anyos nga bata human kini gitigbas sa iyang hubog nga silingang babaye sa Sitio Saac, barangay Buaya, dakbayan sa Lapulapu sa milabay’ng hapon.

Ang biktima mao si Jerome (ngan gipugngan) 5-anyos, residente sa maong dapit ug nagtungha sa usa ka daycare center sa maong barangay.

Gitumbok nga mitigbas sa bata mao si Gladys Castillo, 36 anyos ug silingan sa biktima diin unom na ka bulan nga nagpuyo sa maong dapit gikan sa lalawigan sa Pangasinan.

Base sa imbestigasyon sa kapolisan, nasuta nga mga alas 5:18 sa milabay’ng hapon hubog si Castillo sa dihang iyang gitigbas ang bata sa wala pa masayring motibo niini.

Si Jerome nga samaran sa iyang walang bahin sa ulo ug sa kamot gidali kini pagdala sa Lapulapu City Hospital ug anaa gipaubos kini sa obserbasyon sa mga mananambal.

Samtang si Castillo dali ra usab nasikop sa kapolisan ug gitugyan kini ngadto sa Women’s and Children’s Desk alang sa tukmang kaso nga ipasaka batok ni Castillo.

Sa pakighinabi sa Banat News ni Castillo, hugot kining mihimakak sa alegasyon nga siya ang mitigbas sa bata.

Matud pa ni Castillo natulog siya sa ilang panimalay sa dihang kalit kini nga gidakop sa kapolisan ug nahibulong nga siya ang gitumbok nga mitigbas sa 5-anyos. Mitumbok hinuon si Castillo sa nagpailang saksi sa maong krimen nga iyang higpit nga kaaway hinungdan nga siya ang gitudlo sa pagtigbas sa bata. Nagduda ang kapolisan sa pangisip sa suspetsado hinungdan nga magpataka na lang kini og estorya.

Matud pa ni SPO3 Editha Patalinjug sa Women’s and Children’s Desk nga kasong attempted murder ang ipasaka batok kang Castillo ngadto sa piskaliya. – BANAT NEWS