Eskapo misagol sa basura

CEBU, Philippines - Usa ka piniriso sa Cebu City Jail ang gipangita karon sa mga awtoridad human naka-eskapo niadtong miaging adlaw nga gituohang misakay sa garbage truck nga nagkuha og mga basura sa bilanggoan ug misagol sa mga basura sa bilanggoan aron dili makit-an sa mga guwardiya sa gate.

Si Insp. Anaclito Dusaran, chief custodian sa Cebu City Jail nga nahinabi sa Banat News mitug-an nga diha na nila nahibaw-an sa alas 9 sa gabii sa miaging adlaw nga dunay naka-eskapo nga piniriso sa dihang gihimo ang final headcount sa mga piniriso sa dili pa mangatulog.

Matud ni Dusaran nga gisubli pag-usab ang final headcount apan kuwangan gyud og usa ka piniriso hinungdan nga gisubay dayon ang tibuok palibot sa maong bilanggoan apan wala gyud nila hikit-i.

Maka-upat ka higayon nga gipahigayon ang headcount sa usa ka adlaw, unang headcount himuon alas 7 sa buntag, sunod alas 12 sa udto dayon sa alas 6 sa gabii ug katapusan mao na ang alas 9 sa gabii.

Iyang giila ang pinirisong naka-eskapo nga mao si Reynard Lindayao Marturillas, taga sitio Baka, barangay Banilad ning siyudad, ug nakonbikto sa duha ka mga kaso.

Si Marturillas unang nakonbikto og usa ka buwan sa kasong paghupot og mahait nga hinagiban ug ang ikaduha maoy labing bug-at kay nakonbikto siya sa paghupot og ginadiling drugas ug gisentensiyahang mabilanggo sulod sa 12 ngadto sa 15 ka tuig.

Matud ni Dusaran nga ang garbage truck sa Department of Public Services (DPS) sa Cebu City Government nga gimaneho ni Oscar Orillo misulod sa bilanggoan alas 2 sa hapon nga nagkuha sa mga basura ug wala kini magdugay mibiya kini human nakarga ang tanang basura.

Nagtuo si Dusaran nga misakay ug mitago sa mga basura sulod sa garbage truck si Marturillas hinungdan nga wala kini mabantayi sa mga guwardiya sa gate.

Si Dusaran miingon nga ilang ipatawag si Orillo sa ilang pagahimuon nga imbestigasyon sa pagduda nga posibleng kaila sila ni Marturillas.

Tungod sa pag-eskapo ni Marturillas, ilang gi-dispatch ang duha ka team sa Bureau of Jail Management and Penology (BJMP) alang sa pagpangita ni Marturillas aron madakpan ug pabalikon sa Cebu City Jail.

Ang kadagkoan sa Cebu City Jail makig-alayon sa Negros Oriental sanglit ilang nahibaw-an nga lumad nga taga Hiba-iyo, Guihulngan City si Marturillas. – BANAT NEWS