Hardenero napunggit sa dalan namatay

 CEBU, Philippines – Patay ang usa ka hardenero human kini mabanggai sa usa ka jeep pasaheroan pasado alas-9 sa miaging gabii diha sa dalan Ramos sa barangay Cogon-Ramos ning dakbayan.

Ang biktima giilang si Armando Delos Santos, samtang ang nakabangga kaniya mao ang pasaheroang may rota nga Lahug-Colon (O4C) nga gimaneho ni Wilfredo Amante, 43, molupyo sa sitio Lomboy Ibabaw Mambaling ning dakbayan.

Sa pakighinabi sa Banat News ni PO3 Anthony Delegero sa Traffic Group mibutyag kini nga wala mabantayi ni Amante ang biktima nga kalit milabang sa dalan.

Matud pa ni Delegero nga tungod sa kakusog sa impact nakaangkon og seryosong samad sa kalawasan ang biktima ug dali nga gitabang sa mga sakop sa Emergency Rescue Unit Foundation ug gihatod sa Cebu City Medical Center.

Apan matud pa ni Delegero nga dihang ilang gitawgan ang maong tambalanan gikatahong nakabsan na sa kinabuhi ang biktima kagahapon sa kaadlawon.

Kasong reckless imprudence resulting to homicide ang posibleng atubangong kaso ni Amante kun ugaling mopasaka og kaso ang tagtungod sa biktima. (BANAT NEWS)