2 ka gun for hike miikyas

CEBU, Philippines - Duha ka gipasanginlang gun for hire sa habagatang bahin sa lalawigan nakaikyas sa ronda nga gipahigayon sa mga sakop sa Provincial Intelligence Branch (PIB) ug Regional Anti-Illegal Drugs Special Operation Task Group (RAIDSOTG) niadtong Huwebes sa buntag.

Ang gilusad nga pagpangronda pinasikad sa search warrant nga giisyu ni RTC Judge Soliver Peras sa Branch 10 tungod sa kalapasan sa paghupot og armas nga walay lisensya.

Sigun sa report sa Operation Branch sa Cebu Provincial Police Office (CPPO) alas 7:30 sa buntag ang grupo sa PIB nga gipangulohan ni Supt. Rodulfo Albotra ug RAIDSOTG Supt. Marvin Sanchez mironda sa panimalay ni Edwin Bacusmo Sarda diha sa Kapuso-an St. sa Pobalcion Sibonga.

Nakuha gikan sa panimalay ni Sarda ang usa ka .45 nga kalibreng armas, pito ka buhing bala sulod sa magazine niini, duha ka medium size nga gituohang ang sulod shabu, usa ka tin foil, usa ka holster nga gisulod sa bag.

Samtang pagkaalas 8:45 gisunod pagronda ang panimalay ni Edward Capistas Gicale diha sa sitio Patio, Colawin sa lungsod sa Argao ug nakuhaan kini og homemade caliber .38 snub nose revolver ug dunay lima ka bala, laing duha ka bala sa cal. 5.56 ug usa ka dakong pakete nga may sulod nga gituohang shabu ug drug paraphernalia.

Si Sr. Supt. Erson Digal, hepe sa kapolisan sa lalawigan nagkanayon nga sila si Sarda ug Gicale parehong gun for hire nga naglihok diha sa habagatang bahin sa lalawigan.

Si Sarda maoy gisundan sa kapolisan sa siyudad sa Carcar human gipusil ang usa ka negosyante og motorsiklo niadtong Lunes sa gabii diha sa Poblacion 2 Carcar, nga si Eric Uraca.

Matud ni Digal, si Gicale igsuon ni Lupe Gicale nga maoy mipusil kang Uraca kinsa nadakpan uban sa laing usa nga kauban ug napasakaan na og kaso uban sa mastermind niini.   (BANATNEWS)