Oposisyon mosuporta ni Cortes

CEBU, Philippines - Nalipay si Mayor Jonas Cortes sa dakbayan sa Mandaue human niya hisayri nga ang tulo ka mga oposisyong konsehal sa dakbayan misaad nang mosuporta kaniya.

Sila mao si Konsehal Editha Cabahug, Emarie Ouano Dizon ug Gian Gubalani.

Matud pa ni Cortes nga usa kini ka timaan nga anaa na sa maayong direksyon ang konseho sa dakbayan.

Kini tungod kay may panaghiusa na ang mga konsehal sa pag-umol sa mga butang nga alang sa kaayohan sa Mandauehanon.

Gipasabot usab ni Cortes nga ikapatuman na kadtong mga proyekto nga wala ikapatuman kaniadto tungod kay gibabagan sa mga oposisyong konsehal sa dakbayan.

Hinuon sa bahin ni Dizon, siya nagkanayon nga basta kaayohan sa dakbayan ug sa katawhan, andam siya sa pagsuporta niini, apan kun masabtan usab nila nga dili ikaayo sa tanan, mosupak usab sila.

Kini tungod kay alang kang Dizon, gikinahanglan kaayo ang check and balance sa usa ka maayong administrasyon, busa sila ang usa sa mosil-ing pag-ayo niining tanan.

Nasayran usab sa Banat News nga ang nakaaghat kang Dizon sa pagsuporta sa administrasyon mao ang iyang apohan nga si kanhi mayor Alfredo “Pedong” Ouano diha sa maong dakbayan. – BANAT NEWS