Gipunggotan sa kaaway'ng silingan

CEBU, Philippines - Patay nang nadangat sa tambalanan ang usa ka 38-anyos nga lalaki kansang ulo mitu-ay na ug panit nalang ang nagtapot human gitigbas sa iyang barkadang gikaaway diha sa sitio M. LhuIllier sa barangay Heninsulan sa lungsod sa San Francisco sa Isla sa Camotes niadtong Huwebes sa ala 1:00 sa hapon.

Ang biktima mao si Santos Maloloy-on Mahusay, 38, molupyo sa nahisgutang lugar, samtang ang suspek mao ra usab ang iyang higalang si Lorien Formentera, 36, molupyo ra usab sa maong dapit.

Matud pa ni PO2 Luifran Plaza imbestigador sa San Francisco Police dihang nahinabi sa Banat News nga ang biktima ug suspek diha sa usa ka gi-abandonar nga payag sa wala pa ang hitabo apan nagkalalis.

Gikatahong nagkainitay og maayo ang duha ug misangko sa pagpanigbas.

Ang biktima nga napunggot ang liog human sa pagpanigbas gituohang namatay diha-diha apan gisuwayan pa og hatud sa Ricardo Maninggo Memorial Hospital sa lungsod sa San Francisco apan gideklarar kining dead on arrival.

Matud ni PO2 Plaza posibleng misukol pa ang biktima ug nanagang sa pagtigbas sanglit daghang mga samad tinigbasan sa mga bukton ug kamot niini hangtud nga nahapsan ang liog niini.

Ang suspek daling nakasibat human sa hitabo apan nadakpan ra usab kini sa mga tanod sa maong lugar ug mao nay mitugyan ngadto sa kapulisan ug nagtingkagol na karon sa karsel samtang nagpaabot sa tukmang sumbong nga ipasaka batok niya.   – BANAT NEWS