Cortes ug mga kauban manumpa

CEBU, Philippines - Mokabat sa 6,000 ka mga card sa Philhealth ang gitakdang ipanghatag karong adlawa ni Mayor Jonas Cortes ug kaubanang mga opisyal inighuman nila og panumpa sa pagdawat nila sa bag-ong mandato sa ilang politikanhong karera sa dakbayan sa Mandaue.

Ang maong mga card alang sa 27 ka mga barangay sa dakbayan kansang ngalan sa hatagan niini anaa na sa mga kamot sa matag kapitan sa barangay.

Busa ang pagpanumpa ni Mayor Cotes ug mga kaubanan himuong usa ka makasaysayanon ug mabulokong higayon alang sa mga Mandauehanon.

Kini tungod kay pagasubhan ni Mayor Cortes ang iyang bag-ong administrasyon sa usa ka gimbuhatong puno sa pagmahal sa iyang mga konstituwente.

Kay ang card sa Philhealth nagsimbolo sa pagmahal alang sa lawas ug pagluwas sa kinabuhi sa mga makadawat niini.

Ang panumpa nila ni Mayor Cortes dumalahon ni Executive Judge Marilyn Lagura Yap sa Regional Trial Court (RTC )7 nga nagbase sa dakbayan sa Mandaue.

Unang papanumpaon mao ang walo ka mga konsehal nga pulos sakop sa Team Honesty nga mao sila si Konsehal Diosdado Suico, Jimmy Lumapas, Bethjoveen Andaya ug Jose Jefferson Ceniza, kinsa pulos nasublian pagkapili sa maong katungdanan.

Isunod usab sila si konsehal Benjamin Basiga, Elstone Dabon, Demetrio Cortes Jr., ug manlalaban Nenita Layese.

Si Bise Mayor Bercede manumpa sa ikatulong hugna, samtang si Mayor Cortes manumpa sa ika-upat nga hugna, ug ang tibuok kalihukan pagasaksihan sa kaliboan ka mga Mandauehanon.

Si Mayor Cortes mibutyag sa Banat News nga ang tumong niya sa pagpanumpa nga may ipanghatag siyang card sa Philhealth usa ka pagpakita niya sa tanang Mandauehanon nga ipadayon niya ang maong programa sanglit gusto niyang makatabang ilabi na sa mga kabus nga mga molupyo sa dakbayan. – BANAT NEWS