Gidunggab mata nabuslot

CEBU, Philippines - Nabuslot ang mata sa usa ka lalaki dihang nasabak kini sa kabilya nga gigamit sa iyang higala sa pagdunggab kaniya didto sa Sitio Bonbon, Barangay Caw-oy, Isla sa Olango sa milabay’ng buntag.

 Ang biktima mao si Renante Sitoy Badinas, 29, ulitawo, nga taga sitio Bonbon, samtang ang suspetsado mao usab si Cristino Paquibot Mondido, 36, silingan ug suod nga higala sa biktima.

 Si SPO3 Rex Ibanez sa Crime Against Persons desk mibutyag sa Banat News nga sa sayo pa nag-inom ang biktima ug ang suspetsado uban sa ilang mga higala ug sa dihang nangahubog na mitumaw ang panaglalis tali ni Badinas ug Mondido.

 Unya nagsinumbagay ang duha, ug miuli sa ilang balay si Mondido, apan mibalik kini nga nagdala na sa usa ka 8mm nga kabilya nga may 20 pulgadas ang ang gitas-on ug tinalinsan ang tumoy. Dihang nakit-an niya si Badinas walay kukaluoy nga gihansakan ang mata niini ug dihang nabuslot ang mata, giduslak usab ang tiyan ug dughan sa biktima.

Dali nga gihatod ang biktima ngadto sa district hospital sa Olango unya gibalhin kini sa Lapulapu City Hospital.

Nasikop usab dayon sa kapolisan ang suspetsado ug nagtingkagol na kini karon sa prisohan. (BANATNEWS)