Dalaga gitulis suspek nadakpan

CEBU, Philippines - Nadagit sa mga tulisan ang dul-ang P10,000 nga cash ug mga alahas sa usa ka dalaga kinsa gitulis didto sa sitio Ward 3, barangay Poblacion, lungsod sa Minglanilla kagahapon sa alas 2:00 sa kaadlawon.

Ang biktima mao si Baby Jane C. Enad, 25, dalaga, nga taga Minglanilla, ug usa ka estudyante.

Samtang usa ra sa tulo ka mga tulisan ang nailhan nga si Galio dela Hente, 26, ulitawo nga taga barangay Pakigne, sa maong lungsod.

Sumala sa kapolisan sa Minglanilla nga nagpalit og snacks sulod sa merkado sa Poblacion Ward 3, ang biktima dihang giduol siya ni Dela Hente ug gitionan og armas de fuego uban sa pahibalo nga tulis.

Sa kahadlok nga patyon siya , gihatag nalang sa biktima ang iyang bag nga gisudlan sa P3,000 nga cash, cell phone ug uban pang mga alahas sa sulod niini.

Ang biktima nga walay nahimo gawas sa paghilak, gikuyogan sa mga drayber sa habalhabal sa maong lugar sa pagsumbong ngadto sa kapolisan.

Gumikan sa kaabtik nga milihok sa kapolisan, nadakpan dayon nila si dela Hente.

Gibalhug diha-diha kini sa prisohan, samtang gipangita dayon sa kapolisan ang duha niya ka kauban.

Usa ka tukmang kaso ang ipasaka sa biktima batok sa suspetsado. (BANATNEWS)