Opposition councilors sa Mandaue nanumpa kang Revilla

CEBU, Philippines - Adto nanumpa ang mga konsehal sa oposisyon sa dakbayan sa Mandaue sa buhatan ni Senador Ramon "Bong" Revilla, Jr. sa Makati Sports Club sa Manila kagahapon. Ang nanumpa kang Revilla sa ilang katungdanan mao sila si Emmarie Dolores "Lolypop" Ouano-Dizon ug Editha Cabahug human wala makahigayon og anhi ang senador gumikan sa kadaghan sa mga opisyal niining kalihukan.

 Si Ouano-Dizon, mao ang anak ni Cebu Sixth District Provincial Board Member-elect ug kanhi Mandaue City Mayor Thadeo Ouano ug apo sa kanhi mayor sa maong dakbayan nga si Alfredo "Pedong" Ouano.

“We took this oath before Senator Revilla because he is very close to our family," matud pa ni Ouano-Dizon.

Si Ouano-Dizon nagkanayon nga ang iyang banang si Nixon "Jojo" Dizon maoy usa sa mitabang sa kandidatora ni Revilla atol sa pagpangampanya sa naulahi sukad pa niadtong 2004.

Si Revilla nag-una sa senatorial race sa Cebu niadtong 2004 ug sa nakalabay’ng May 10, 2010 elections.

Samtang ang bana ni Cabahug maoy kapikas ni kanhi konsehal Raul "Boy Pokang" Cabahug. Si Cabahug anaa na karon sa iyang ikatulong termino isip konsehal sa dakbayan samtang mao pa kini ang labing unang termino ni Ouano-Dizon.  – BANAT NEWS