Giulo pagpusil sa diskohan patay

CEBU, Philippines - Naglunang sa kaugalingong dugo ang usa ka lalaki nga giulo pagpusil sa wala mailhing mamumuno pasado alas-11 sa miaging gabii sa sitio Lawom Tabay barangay Sta. Cruz lungsod sa Ronda.

Ang biktima nailhan na si Pedro Destor Abraham, 29, molupyo sa maong lugar ug nakaangkon og samad pinusilan sa iyang ulo.

Sa pakighinabi sa Banat News ni PO1 Benjie Garcia, desk officer sa Ronda Police kini mibutyag nga nagsayaw-sayaw sulod sa diskohan ang biktima human adunay gipahigayon nga kalingawan sa maong lugar.

 Samtang nagkalingaw ang biktima kalit lang nga nautingkay ang mga mitambong sa maong disko kini human kalit lang nga adunay buto sa armas ang ilang nadungog sa maong lugar.

Dihang gisusi ug mao nalay nakit-an ang biktima nga maayong pagkahagba sa diskohan.

Matud pa ni PO1 Garcia nga ilang napanglantawang gidul-it ang pagpusil sa biktima base sa naangkon nga igo niini sa ulo.

Apan matud pa ni Garcia base usab sa mga nadunggang impormasyon gikan sa mga tawo sa maong lugar upat ka buto sa armas ang ilang nadunggan apan ang biktima nakaangkon lang og usa ka samad pinusilan sa ulo.

Nakuha gikan sa crime scene ang upat ka kabhang sa kalibre .45 ug usa ka kabahang sa 9mm kalibreng bala. - BANAT NEWS