Naghikog!

CEBU, Philippines - Patay na ug naglunang sa kaugalingong dugo ang usa ka amahan human kini nagpusil sa kaugalingon sulod sa ilang lawak sa miaging gabii sa dalan P. Del Rosario Extension sa Ariola subdivision barangay Sambag 1.

Si Rodrigo Pinay, 52, nakaangkon og samad pinusilan sa tuong bahin sa iyang liog gidudahang naghikog ginamit ang kalibre .38 rebolber human kini nakig-away sa iyang anak kabahin sa resibo.

Matud pa sa anak niini nga si Rhea, usa ka nurse sa usa ka pribadong tambalanan, nga samtang nagluto siya og pagkaon kalit lang nga adunay buto sa armas nga iyang nadunggan.

Tungod niini daling midagan pag-adto sa lawak sa iyang amahan si Rhea ug didto iyang nakit-an ang iyang amahan nga naglunang na sa dugo tupad niini ang maong armas.

Dali usab nga gitabang ni Rhea ang amahan pinaagi sa pag-apply og Cardio Pulmonary Resuscitation (CPR) samtang nagsiyagit usab kini og pakitabang sa mga kabanay ug daling gidala sa Cebu City Medical Center.

Gumikan sa kagrabe sa samad, gibalhin kini ngadto sa Chong Hua Hospital apan nakabsan gyud kini sa kinabuhi.

Sa pagpahigayon og crime scene investigation nakuha sa kapolisan ang usa ka kabhang sa kalibre .38 nga maoy gituohang gigamit sa pagpusil samtang wala na usab nakita pa sa kapolisan ang armas nga gigamit niini.

Matud pa ni PO3 Geoffrey Gutual nga sa wala pa mahitabo ang paghikog ni Pinay nagkalalis kini sa iyang anak nga kinamaguwangan kabahin sa gipapalit nga uniform niini nga para unta sa manghod.

Apan gikatahong wala makapakita og resibo ang amahan nga miresulta sa panaglalis sa duruha ug maoy gituuhang nakapahiubos niini ug naghikog.

Dugang pa ni Gutual kinahanglang ipa-paraffin test si Pinay kini aron masayran kun nakapabuto ba kini og armas. – BANAT NEWS