Edukasyon unang tutokan ni Diamante

CEBU, Philippines - Si Tuburan mayor-elect Jun Mercado Diamante motutok sa mga proyekto alang sa edukasyon sa mga batan-on sa lungsod tungod sa naagian niining kalisod sa dihang nagtungha pa siya hangtod nga nalampos sa iyang pagtuon.

Matud ni Diamante nga iyang pangandoy ang pag-empower sa mga kabus sa ilang lungsod diin buot niyang makabaton sila og access sa mass-based education.

“The more knowledge a person gets, the more he realizes what area he is ignorant in and a person who thinks he knows everything has the most to learn,” ni Diamante pa kinsa mi-quote sa pasumbingay sa iyang paboritong Hindu author.

Ang mayor-elect kinsa mihulagway sa ilang kalisod ug gani lakawon lang niya ang walo ka kilometro gikan sa ilang balay paingon sa tunghaan niadto sa Marmol, Tuburan Elementary School diin siya migradwar nga valedictorian.

Gibutyag niini nga sa 1,000 ka mga valedictorian sa mga tunghaan sa Tuburan siya maoy ika-16 ug gihatagan og katungod nga makasulti ngadto sa uban nga mga kauban niyang mga valedictorian graduates sa dihang nagtigum sila niadtong tuig 2008.

Sa maong tigum iyang gibatbat nga “Dili Diay Babag Ang Kalisod sa Kalampusan.”

Matud ni Diamante nga iyang paningkamutan nga ang tanang mga valedictorian sa ilang lungsod mahatagan og mga scholarship, makatungha sa University of the Philippines (UP) ug mahatagan og libreng tuition fees ug mga textbooks ug mahatagan usab og mga allowance. (BANATNEWS)