Lalaking naghantak gipatay

CEBU, Philippines - Patay diha-diha ang usa ka lalaki ug laing usa ang samaran human kini mapusili sa usa ka wala mailhing tawo diha sa barangay Mandalikit, lungsod sa Argao pasado alas 4:50 sa sayo sa buntag kagahapon.

Ang biktima naila nga si Lasly Atilado Gaceta, 46, lumad nga taga Negros Oriental apan diha na magpuyo sa maong dapit.

Matud pa ni PO2 Von Tecson sa Argao Police Station dihang nahinabi sa Banat News nga ang maong biktima naghantak sa nahisgutang dapit atol sa ilang kapistahan kagahapong adlawa uban sa mga higala dihang kalit nga miduol ang usa ka tawong nagsuot og puti nga t-shirt ug dayong pusil kaniya.

Nakaangkon og samad pinusilan sa buko-buko nga milapos sa iyang dughan hinungdan sa hinanali niining kamatayon ug wa na madala pa sa tambalanan.

Atol sa pagpamusil napagan usab ang usa ka Jerson Datuin nga usa sa mga nag-apong sa maong hantakan ug naigo sa iyang walang tiil ug gidala sa Isidro Kintanar Memorial Hospital. Adunay usa ka Field Training Police nga nakabantay sa maong insidente nga gidestino sa maong lugar apan dali kaayong nakaikyas ang mamumuno kinsa midungan og dagan uban sa mga tawo padulong sa ngitngit nga bahin sa lugar.

Wala pa matino kung aduna bay kontra ang biktima apan adunay gikatahong niadtong milabay’ng adlaw nagpakita og armas ang biktima.

Dihang ilang giukang ang patay’ng lawas sa biktima, aduna kini gisukbit nga .357 rebolber nga may lima ka mga buhing bala sa bulsa niini.

Ang mga kapulisan padayon pa sa ilang paghimo sa imbestigasyon mahitungod sa nahitabo ug sa pagsuta kung kinsa ang maong mamumuno. – BANAT NEWS