'Akyat Bahay' gitipi

CEBU, Philippines - Patay ang usa ka ex-convict ug suspek nga ‘akyat-bahay’ human kini pusila sa wala mailhing lalaki nga nagsul-ob og bonnet niadtong Sabado sa hapon diha sa sitio Kayam, barangay Ward I, Poblacion, lungsod sa Minglanilla.

Ang biktima giila sa mga polis nga si Noel “Wiwi” Epe, taga barangay Ward II, Poblacion sa maong lungsod nakaangkon og usa ka samad pinusilan sa ulo wala na makaabot nga buhi ngadto sa Minglanilla District Hospital.

Si PO2 Jade Abrica, duty desk officer sa Minglanilla Police Station sa pakighinabi sa Banat News nagkanayon nga sa wala pa mahitabo ang insidente si Epe naglakaw diha sa karsada.

Ang nahisgutang lalaking nag-bonnet kalit lang kining mitungha ug dayon pusil ngadto sa biktima.

Ang hepe sa Minglanilla Police Station nga si Chief Insp. Jovito Canlapan sa pakighinabi niini sa Banat News mibutyag nga si Epe usa ka kanhi “akyat bahay” ug ex-convict tungod kay nakapatay kini ug niadtong milabay’ng tuig lang nakagawas gikan sa Cebu Provincial and Rehabilitation Center (CPDRC).

Matud pa ni Canlapan nga sa maong tuig gihapon dihang bag-o pang nakagawas si Epe gikan sa prisohan nakadunggab kini sa ilang silingan ug nagtago-tago.

Si Canlapan midugang nga usa sa anggulong ilang gilantaw mao ang mga nakaatraso niini tungod kay dako ang posibilidad nga dunay nagdumot ni Epe nga iyang mga nakaaway kaniadto. – BANAT NEWS