Ulitawo gibuko-buko pagpusil

CEBU, Philippines - Samdan sa buko-buko ang usa ka ulitawo human kini pusila sa wala hiilhing kriminal didto sa barangay Poblacion East, lungsod sa Moalboal sa miaging kaadlawon.

Ang biktima mao si Libert Igougan, 20, ulitawo, nga taga Poblacion East, samtang ang nakapusil kaniya giingong amigo sa iyang kontra.

Si SPO2 Edgar Labe, desk officer sa Moalboal Police Station mibutyag sa Banat News  nga sa ilang pagsukitsukit sa mga molupyo sa lugar diin pusila ang biktima, ilang nasayran nga amigo sa ginganlan og Jubert Abrinica nga kaaway sa biktima ang miluthang sa naulahi.

Apan napakyas ang kapolisan sa pagkuha sa ngalan sa giingong namusil kay misibat man si Jubert dihang ila kining giadto sa ilang balay.

Ang biktima, daling gidala sa Don Vicente Sotto Memorial Medical Center sa dakbayan sa Sugbo, samtang padayon pang gipangita sa kapolisan ang kriminal. – BANAT NEWS