Suspek sa pagpatay sa kapitan nailhan

CEBU, Philippines - Ang anggulo sa illegal nga drugas ingon man ang politika maoy gilili karon sa kapolisan may labot sa pagbanhig sa barangay kapitan sa Ocaña sa dakbayan sa Carcar nga si kapitan Jose Diac Husain niadtong milabay’ng adlaw.

Padulong na pauli sa ilang balay niadtong kaadlawon sa adlaw’ng Biyernes si Husain sakay sa multicab gikan sa ilang barangay hall dihang gibanhigan sa wala mailhing mga gikatahapan.

Si PO3 Irving Avila sa Carcar City Police Station nga nahinabi sa Banat News mibutyag nga duna na silay gisundan karong mga tawong maoy posibleng mipatay sa kapitan apan nagdumili una kini paghatag og dugang impormasyon.

Si Husain usa ka drug crusader sa siyudad ug ubay-ubay na ang napadakop niining mga nalambigit sa ginadiling drugas diha sa ilang lugar hinungdan nga dili layo ang posibilidad nga daghang nasuko niini.

Gawas pa niini, si Husain lider ni Mayor-elect Nicepuro Apura ug gipatay ang biktima dihang liwas na sa eleksiyon.

Ang kapolisan nagsusi usab kung duna bay pagpanghulga nga nadawat ang kapitan aron masubay ang hinungdan sa pagpatay niini dihang wala pa siya banhigi. (BANATNEWS)