Kapitan gibanhigan

CEBU, Philippines - Gibanhigan ang kapitan sa barangay Ocaña, siyudad sa Carcar nga lider ni mayor-elect Necipuro Apura samtang sakay sa service multicab sa barangay samtang nagpaingon mopauli sa sitio Bagsiji, kagahapon sa alas 12:45 sa sayong kaadlawon.

Si Kapitan Jose Diac Husain, 41, ulitawo ug OIC barangay captain sa Ocaña nabulit og mga bala sa lawas agi sa wala matinong kalibre sa armas.

Samtang sa paghimo ning balita wala pa matumbok sa kapolisan ang gibanabanang duha ngadto sa tulo ka mga mamumuno.

Matud ni Insp. Socrates Medillo sa Carcar City Police Station sa dihang nahinabi sa Banat News, ang biktima gikan sa barangay hall ug paingon na kining mopauli nga nag-inusara.

Apan pag-abot niini sa maong lugar kalit lang mipaka ang sunodsunod nga boto-boto sa armas duol sa pinuy-anan sa usa ka kagawad nga nailang si “Abregana” apan walay bisan usa ka silingan nga nanggawas tungod sa kahadlok mapagan.

Paglabay na og pipila ka minutos una pa gisusi ang boto-boto sa armas ug didto na makit-i ang kapitan nga nagkadugo na nga nagbuy-od sulod sa multicab sa barangay.

Daling gipahibalo ang kapolisan ug sa pag-abot sa mga mirespondeng mga polis, igo na lang silang naka-recover og pito ka kabhang sa bala sa kalibre .45 ug tulo ka deformed slugs ingon man usa ka kabhang sa kalibre .38.

Dili mominos unom ngadto sa pito ka samad pinusilan sa dughan, tuong bahin sa ilok ug ubang bahin sa lawas ang naangkon ni Husain.

Ang mga silingan ug molupyo sa maong barangay nga gisukitsukit sa kapolisan pulos mihulagway nga maayong tawo ang kapitan ug wala kini kontra sa ilang lugar ug gani duha ka higayon kining napili pagka-numero-unong kagawad sa wala pa mo-asumir pagka OIC barangay captain human milarga sa gawas sa nasud ang kapitan nga si Melo Bayawa.

Si Cebu Police Provincial Office director Sr. Supt. Erson Digal mibutyag nga tulo ka anggulo ang gitutokan sa mga imbestigador.

Una ang politika sa Carcar, ikaduha ang away sa mga sindikato sa drugas sa maong siyudad ug ikatulo ang posibilidad nga adunay personal nga naka-away si Husain. (BANATNEWS)