Gumikan sa tabi-tabi mga asawa naglinubaay

CEBU, Philippines - Pulos angol ang tulo ka tawo diin duha ang babaye niini ug usa ang bayong-bayong, human kini magdinunggabay gumikan sa libak ug selos didto sa barangay Poblacion, lungsod sa Liloan,kagahapon sa pasado ala 1:00 sa kaadlawon.

Ang mga biktima mao sila si Cristina Duran, 43, minyo, nga taga Poblacion, Rosita Udtohan, 45, uban sa anak niining l5 anyos nga bayong-bayong, nga pulos silingan ni Duran.

Sumala sa kapolisan nga nahitabo ang dinunggabay gumikan sa mga tabi-tabi nga matud pa gikabit kuno ni Udtohan ang bana ni Duran.

Gumikan sa kapungot ni Udtohan gisulong niya uban sa iyang anak si Duran.

Sa pagkakita ni Duran nga atakihon na siya ni Udtohan ug sa anak niini, milanit usab siya sa iyang kutsilyo dayon nagharong sila sama sa duelong salida sa sine.

Dihang naghinansakay na sila, gipataroyan ni Duran sa iyang kutsilyo ang ilok ni Udtohan, apan bisan og misirit na ang dugo, mihiwasa gihapon si Udtohan ug didto gikadlitan usab niya ang kamot ni Duran.

Ang batan-ong anak ni Udtohan napagan usab sa pagkasamad sa lawas niini.

Ang mga misaksi nga silingan maoy midala dayon sa tulo ngadto sa Vicente Sotto Memorial Medical Center sa dakbayan sa Sugbo.

Samtang ang bana ni Duran nga naglagot gumikan sa pagkagusbat sa ilang balay dihang nagdinumogay ang iyang asawa ug si Udtohan kinsa giingong gikabit niya, misumbong sa kapolisan sa maong lungsod. – BANAT NEWS