Menor gisanggot

CEBU, Philippines - Samaran ang usa ka bayong-bayong human kini tigbasa og sanggot sa iyang higala didto sa barangay Rizal, lungsod sa Pinamungajan sa miaging kaadlawon.

Ang biktima mao si Jason Talaid, 16, nga taga Rizal, samtang ang suspetsado mao si Jeffrey Villarin, 18, higala ug silingan sa biktima.

 Si PO2 Salvador Samillano Jr. desk officer sa Pinamungajan Police Station, mibutyag sa Banat News nga naglakaw si Talaid ug Villarin uban sa ilang mga higala pauli sa ilang mga balay gikang nanisko, dihang nagkalalis ang biktima ug ang suspetsado.

Gumikan malagmit sa kainit sa ulo , ilabi na nga nagtangkil daan kini og sanggot, gikagotan dayon sa suspetsado ang liog sa biktima apan nakalihay ang biktima hinungdan nga ang pikas bahin ra sa lawas niini maoy natabas.

Gihatod dayon sa tambalanan ang biktima, samtang ang suspetsado mitahan usab ngadto sa kapolisan ug mikagulkol na karon sa prisohan.  (BANATNEWS)