Simbahan mo-evaluate sa kandidato

CEBU, Philippines - Usa ka organisasyon sa simbahan miinsister nga ang mga lokal nga kandidato sa Sugbu i-evaluate subay sa “People's Criteria” ug mopahigayon og training sa mga volunteers sa kontra-tikas atol sa umaabot nga election sa Mayo.

Si Fr. Jess Dumaual, ang co-chairman sa Ang Pagbabag! People's Movement for Change Cebu mipahibawong ang ilang grupo anaa sa proseso sa pagtigum sa track record ug plataporma sa mga nagpapiling mga kandidato sa Sugbu karon ug ilang gisusi kun misubay ba sila sa ‘people's agency’ ug criteria.

Matud pa ni Fr. Dumaual nga ang people's criteria for candidates ug people's agenda for change maoy mosumada ngadto sa lima ka mga nag-unang mga punto mao ang pagkamatinud-anon, accountability ug hustisya, ekonomikanhong kalamboan ug kalikupan, kaayohan ug serbisyo sa katawhan, kalinaw ug kaangayan ug paghigugma sa nasud. Tungod niini, si Fr. Dumaual midapit sa katawhan sa pagtambong sa ilang tigom karong Abril 23, 2010 alas 9:00 hangtud sa alas 11:00 sa buntag sa Redemptorist Parish Church, Elizabeth Pond, ning dakbayan.

Diha sa maong tigom ipresentar nila ang resulta sa ilang profiling sa mga kandidato sa Sugbu sa pagkagobernador, pagkamayor ug pagkakongresista.

Gipahibawo usab niini nga ang ilang kalihukan usa ka nasudnong kalihukan sa mga indibidwal ug mga grupong nagtinguha sa tiunay nga kausaban sa nasud ug nagsilbing magbalantay sa katawhan ug usa ka grupo sa ‘kontra-daya’ ug watchdog sa eleksyon nga nag-monitor sa mga iregularidad sa dagan sa piniliay sa Mayo 10, 2010.

Si Fr. Dumaual miawhag sa mga interesadong grupo o tawo nga mosalmot sa Volunteers' Training alang sa “2010 Election Monitoring and Documentation of Election Offense, Fraud and Violence.”

Ang training sa volunteers ipahigayon sa Abril 26, 2010 sa alas 12:30 sa udto ngadto na sa alas 6:00 sa hapon adto sa Redemptorist Seminary Multipurpose Training Center.   (BANATNEWS)