Gipusil sa Bloods paa samdan

CEBU, Philippines -  Samaron sa paa ug bitiis sa mga bala ang usa ka tawo dihang gipareglahan kini og pusil sa mga silingan niyang sakop sa Bloods gang didto sa sitio Eskuwelahan, barangay Basak, dakbayan sa Lapulapu kagahapon sa alas 12:00 pasado sa kaadlawon.

Ang biktima mao si Cepriano Ortega Boyles, 25, minyo nga nagpuyo sa maong lugar, samtang ang mga suspetsado mao sila si Francisco Baguio, Reymart Resoreso, ug laing batan-on nga wala hiilhi, nga iyang mga silingan ug pulos sakop sa Bloods gang.

Si SPO3 Rex Ybañez sa Crimes Against Person sa Lapulapu City Police Station mibutyag nga migawas ang biktima sa ilang balay kauban ang usa ka bata kay mopalit og alak sa silingan nilang tindahan.

Apan sa pagpauli niya sa ilang balay naagian niya ang mga suspetsado nga nag-inom sa daplin sa karsada.

Matud pa sa biktima nga sa walay igong hinungdan gidasmagan siya ug gitabangan og kulata sa tulo, unya wala pa matagbaw gipusil ang iyang paa ug bitiis.

Gihatod dayon sa tagtungod ang biktima ngadto sa Lapulapu City Hsopital samtang ang mga suspetsado gipangita pa sa kapolisan human kini makasibat.   (BANATNEWS)